सिच्छेस्थित चर्च अफ् गडमा ‘फादर्स डे’ पालन

गान्तोक, १९ जून: आज ‘अल सिक्किम चर्च अफ गड’ को ब्यानरमा यहॉंको सिच्छेस्थित चर्च अफ गड मुख्यालयमा फादर्स डे भव्यताका साथ पालन गरियो| 

यस अवसरमा मण्डलीका संस्थापक सदस्यहरूलाई अभिनन्दन जनाइयो| मण्डलीको विकास एवं विस्तार कार्यहरूमा महत योगदान पुर्‍याउने रूपमती रसाईली (राहेल आमा), गोपाल छेत्री दम्पतिलाई मरणोप्रान्त सम्बर्द्धना जनाइयो| यसरी नै संस्थापक सदस्यहरू क्रमशः बीबीमाया रसाईली (मरियम आमा), हन्ना गुरूङ अनि बीबी गुरूङ दम्पतिलाई पनि रेभ. मार्शल गुरूङको बाहुलीबाट सल ओड़ाएर अभिनन्दन पत्र प्रदान गर्दै सम्मान जनाइयो| 

यी अभिनन्दित मण्डलीका सदस्यहरूले सिक्किममा चर्च अफ गड मण्डलीको विकास एवं विस्तार कार्यमा स्थिर र अटल रही महत योगदान पुर्‍याएको बताउँदै चर्च अफ गड गान्तोकका पास्टर मार्शल गुरूङले उनीहरूको योगदानलाई मण्डलीले कहिल्यै पनि भुल्न नसक्ने बताए| सिक्किममा चर्च अफ गडको शुरूवातीकालको विस्तारपूर्वक वर्णन गर्दै चर्च अफ गड मण्डलीमा मुख्यमन्त्रीका श्रीमती टीकामाया चामलिङ अनि छोरा विकास चामलिङको पनि योगदान रहेको रेभ. गुरूङले बताउँदै उनीहरूको योगदानको सम्झना गरे| उनीहरूको योगदानलाई मण्डलीले कहिल्यै पनि भुल्ननसक्ने बताउँदै आगामी दिनहरूमा मण्डलीका विकासमा यसरी योगदान पुर्‍याउनेहरूलाई उनीहरूको योगदानको मूल्याङ्कन गर्दै क्रमबद्ध ढंगमा सम्मान एवं अभिनन्दन जनाइने अवगत गराए| 

आइतवारको मुख्य सेवाकाइपछि शुरू भएको बाबु दिवसमा आरबीआई गान्तोक शाखाका उपमहानिदेशक ओल्देन नङ्प्लू, पास्टर विरोज मोहरा विशिष्ठ अतिथिका रूपमा उपस्थित थिए| 

बाबु दिवसको अवसरमा आयोजित कार्यक्रमलाई मुख्य अतिथिको आसनबाट सम्बोधन गर्दै रेभ. मार्शल गुरूङले बाईबलका पुस्तकहरू क्रमशः कोरन्थी, यर्मिया, हिब्रुबाट प्रकाश पारे| उनले मानिसको जीवनमा खुशी, आनन्दको महत्वबारे बताए| विश्‍वासघाती हुनु राम्रो होइन भन्दै जीवनको लक्ष्यसम्म पुग्नका लागि संघर्षरूपी दौड़लाई जारी राख्नुपर्ने अनि आफ्नो आत्मविश्‍वासलाई बचाइराख्नुपर्ने बाईबलीय शिक्षा दिए| घमण्ड, रिस जस्ता शारीरिक अवगुणहरूबाट टाड़ा रहनुपर्ने आह्वान गर्दै कुविचारहरूबाट अलग रहनसके मण्डली, समाजको सकारात्मक विकास हुने बाईबल धर्मशास्त्रबाट उद्धृत गर्दै भने| उनले मण्डलीको भावी कार्यक्रमहरूमाथि पनि प्रकाश पार्दै यसै वर्ष गान्तोकमा अल इण्डिया चर्च अफ गडको सम्मेलन हुने जानकारी दिए|

यस अवसरमा मण्डलीका बाबुहरूलाई पनि सम्मान जनाउँदै खदार्पण गरी स्मृति चिन्हहरू प्रदान गरियो| बाबु दिवसको अवसरमा मण्डलीका युवाझुण्ड, आमा झुण्ड साथै सण्डे स्कूलका नानीहरू द्वारा ख्रीष्टिय भजन, लघु नाटक, रङ्गारङ्ग नृत्यहरू पनि प्रस्तुत गरिएको थियो| 

विभिन्न जातीय परिधानमा सजिएर कलाकारहरूले बढ़ो सुन्दर ढंगमा ख्रीष्टिय सांस्कृतिक कार्यक्रमहरू प्रस्तुत गरेर उपस्थित सबैलाई मन्त्रमुग्ध पारेका थिए| सम्पूर्ण कार्यक्रमलाई एमोस लेप्चाद्वारा सञ्चालन गरिएको थियो|