वरिष्ठ संगीतकार श्री अम्बर गुरूङको निधनप्रति नेपाली साहित्य परिषद्द्वारा शोक व्यक्त

गान्तोकः नेपाली जगतका सुप्रसिद्ध सङ्गीतकार तथा गीतकार अम्बर गुरूङको निधनमा नेपाली साहित्य परिषद् (नेसाप) सिक्किमले गहिरो शोक सम्वेदना प्रकट गरेको छ|

परिषद् भवनमा ८ जूनको दिन शोक सभा आयोजना गरेर स्वर्गीय अम्बर गुरूङले नेपाली सङ्गीत जगतलाई पुर्‍याएको योगदानबारे चर्चा गरेपछि उनको आत्मलाई चीर शान्तिको कामना गर्दै दुई मिनटको मौन धारण गरियो|

नेपाली सङ्गीतका पिता मानिएका अनि कयौं वरिष्ठ सङ्गीतकारहरूका गुरू रहेका अम्बर गुरूङको निधनले सङ्गीत जगतमा अपूरणीय क्षति भएको पनि परिषद्ले ठहर गरेको छ| उनले दिएको योगदानलाई सदैव स्वर्ण अक्षरमा लेखिने कुरा बताउँदै परिषद् अम्बर गुरूङको निधनको समाचारले स्तब्ध बनेको शोक सन्देसमा उल्लेख गरिएको छ|

परिषद्का अध्यक्ष रूद्र पौड्यालले सुप्रसिद्ध सङ्गीतकार अम्बर गुरूङ आफ्नो समयका एक सशक्त गायक, सङ्गीतकार र गीतकार भएको बताउँदै उनले गाएका गीतहरू अमर गीतमा गनिने बताएका छन्|

परिषद्द्वारा आयोदित शोक सभामा परिषद्का सम्पूर्ण कार्याकारी सदस्य, पूर्व अध्यक्षगण अनि साहित्यकारहरूको पनि उपस्थिति रहेको थियो|