सिक्किम प्रदेश कांग्रेसको सभामा विभिन्न मुद्दाहरूमाथि चर्चा

गान्तोकः सिक्किम प्रदेश कांग्रेस कमिटीले पार्टी अध्यक्ष भरत बस्नेतको सभापतित्वमा तादोङस्थित पार्टी मुख्यालयमा बसेको एक सभामा विभिन्न मुद्दाहरूमाथि चर्चा गरेको छ| सभामा आगामी २५ जूनको दिन रिनाकमा हाट- बजारे सभा गर्ने, पार्टीको भावी रणनीति, कार्यक्रम र पार्टीको दिग्दर्शन पुस्तिका प्रकाशित गर्ने तथा जन-जनमा जाने एवैं ग्राम प्रशासनिक कार्यलयमा जनगुनासोको आधारमा सम्बन्धित अधिकारीहरुसित भेट गर्ने आदि विषयका साथ-साथ पदम बहादुर छेत्रीले गत ०२ जुनको दिन मीडियामा दिएको बयानमाथि पनि चर्चा-परिचर्चा गरेको छ| 

सभामा प्रदेश कांग्रेसले उपरोक्त विषयहरूमा प्रस्ताव पारित गर्दै पदम बहादुर छेत्रीको बयानलाई मध्यनजर राखेर आजदेखि उनलाई पार्टीको प्राथमिक सदस्य साथै पदबाट मुक्त गरिएको जनाएको छ| प्रदेश कांग्रेसले जारी एक विज्ञप्तिमा भनेको छ,‘प्रजातन्त्रमा कुनै पनि व्यक्तिको राजनीति गर्ने स्वातन्त्रता छ| त्यसोसले गर्दा पार्टीमा प्रवेश गर्ने र राजीनामा दिने उनको (पदम बहादुर छेत्री) स्वतन्त्र विचार हुन्छ| यसलाई पार्टीले प्रजातान्त्रिक ढंगमा विश्वास राख्दै उनलाई आजदेखि कांग्रेस पार्टीबाट मुक्त गर्ने निर्णय गरेको छ|’ 

आजको सभालाई सम्बोधन गर्दै अध्यक्ष श्री बस्नेतले भनेका छन्, हामी राजनीति गर्न मैदानमा आएका हौ, पैसा कमाउन आएका होईनौ| त्यसर्थ हामीले विपक्षी दलमा रहेकाले प्रजातन्त्रको धर्म निभाउन इमान्दरपूर्वक काम गरौं| उनले अझ भने, हामी कुनै चानचुने पार्टीको सदस्य नभएर राष्ट्रिय पार्टीको कर्मठ कार्यकर्ता हौ अनि पार्टीमा रहुञ्जेल इमान्दार बनेर काम गरौं| आजको सभामा पार्टीका उपाध्यक्षगण, महासचिवगण लगायत जिल्ला अध्यक्षगण र विभिन्न भातृ संगठनक प्रतिनिधिगणको उपस्थिति रहेको महासचिव (प्रशासन) तारा श्रेष्ठद्वारा जारी विज्ञप्तिमा जनाइएको छ|