कांग्रेस उम्मेदवार श्रीमती सुमित्र राईले विजयी उम्मेदवार डीआर थापालाई दिइन् बधाई

गान्तोक, 15 अप्रेलः सिक्किम प्रदेश कांग्रेस कमिटी तथा 28- अप्पर बुर्तुक उप चुनाउकी उम्मेदवार श्रीमती सुमित्र राईले सम्पूर्ण अप्पर बुर्तुकका मतदाताहरुलाई धन्यवाद दिनका साथै विजयी  स्ताधारी एसडीएफ पार्टीका उम्मेदवार  डी0 आर0 थापालाई बधाई तथा शुभकामना व्यक्त गरेकी छन्।
श्रीमती सुमित्र राईद्वारा जारी विज्ञप्तिमा भनिएको छ, चुनाउ एउटा हार-जीतको प्रक्रिया हो। केवल एकजनाले विजयी हासिल गर्छ र कांग्रेस पार्टीले प्रजातन्त्रको धर्म निर्वाह गर्न तथा लोकतन्त्रको मर्यादालाई कायम राख्न चुनाउमा प्रतिद्वान्दिता गरेको थियो।

उनले अप्पर बुर्तुकका मतदाताहरुले चुनाउको समयमा धैर्य र शान्ति बनाई राखेको र सबै पार्टीका उम्मेदवारहरुलाई खुल्ला रूपमा स्वागत गरेर प्रजातन्त्रको मूल्य र मान्यतालाई कदर गरिदिएकोमा धन्यवाद टक्राउँदै निकट भविष्यमा अप्पर बुर्तुकवासीको सम्पूर्ण समस्या समाधान होस् भन्ने कामना व्यक्त गरेकी छन्।

श्रीमती राईले विजयी भएका उम्मेदवारले पक्ष-विपक्षको भेदभाव नगरी जनता र स्थानीय समष्टिको हितमा काम गर्ने आग्रह विज्ञप्ति मार्फत गरेकी छन्।