जोरथाङ ब्याडमिण्डन एसोसिएशनको कार्यकारिणी समितिको चुनाउ सम्पन्न

गान्तोक, 24 सेप्टेम्बर: दक्षिण सिक्किमको जोरथाङस्थित कार प्लाजाको चौथो तल्लामा रहेको ब्याडमिण्टन हलमा ब्याडमिण्टन एसोसिएशन अफ् जोरथाङको वार्षिक साधारण सभाका साथ-साथै नयाँ कार्यकारिणीको चुनाउ सम्पन्न भयो। सभाको प्रारम्भमा एसोसिएशनका भूतपूर्व अध्यक्ष जिग्मी शेर्पाद्वारा हालै नाम्चीमा सम्पन्न राज्यस्तरीय खुल्ला च्याम्पियनशीपमा एसोसिएशनका पदक विजेता खेला़ड़ीहरूलाई खदा लगाएर सम्मान जनाइयो भने यस क्रममा ब्याडमिण्टन एसोसिएशन अफ् सिक्किमको कार्यकारिणी सदस्यमा निर्वाचित भएका हेमन्त राई अनि विशन मुखियालाई अभिनन्दन जनाइयो। सभामा विशन मुखियाले बजेट रिपोर्ट पनि पेश गरेका थिए।

सभाले नयाँ कार्यकारिणी समितिहरूमा सिक्किम विधानसभाा अध्यक्ष केएन राईलाई मुख्य संरक्षक अनि क्षेत्र विधायक तथा स्वास्थ्य मन्त्री एके घतानीलाई संरक्षक चयन गरियो। यसरी नै सल्लाहकारहरूमा टी. डेञ्जोङ्पा (एसडीएम जोरथाङ), केबी गुरूङ (एसडीपीओ जोरथाङ), टाँशी डाडुल (एसई ऊर्जा) अनि जिग्मी शेर्पालाई निर्वाचित गरियो भने अध्यक्षको रूपमा जिग्मी नामग्येल (एसई ऊर्जा), उपाध्यक्षमा राजेन गुरूङ अनि भानु प्रधान, महासचिवमा विजय तिवारी, संयुक्त सचिवमा किङ्गा भोटिया, दुर्गा प्रधान, कोषाध्यक्षमा रोबिन मुखिया,  सहायक कोषाध्यक्षमा किरण राई, प्रचार प्रसार सचिवमा सुश्री ज्योति राई अनि मनिशा छेत्रीलाई निर्वाचित गरियो भने कार्यकारिणी सदस्यहरूको रूपमा बीएम राई, हेमन्त राई, विशन मुखिया, अशोक मित्तल, आरके गजमेर, अरूण राई अनि शेरिणा एम. गुरूङ निर्वाचित भए। 

सभामा जोरथाङ अनि छेउछाउका स्कूलका विद्यार्थीहरूलाई लिएर शीतकालीन प्रशिक्षण शिविर, जोरथाङ राज्य ओपन च्याम्पियनशीप, स्थायी कोच नियुक्ति लगायत कोष संग्रहको निम्ति तम्बोला खेल आयोजन विषयमाथि पनि चर्चा गरिएको एक विज्ञप्तिमा जनाइएको छ।