साटाद्वारा आयोजित राज्य स्तरीय अन्तर डोजाङ ताइक्वाण्डो प्रतियोगिता सम्पन्न

गान्तोकः  सिक्किम अमेचुअर ताइक्वाण्डो एसोसिएशन (साटा), गान्तोकद्वारा आयोजित २१औं राज्य स्तरीय अन्तर डोजाङ ताइक्वाण्डो प्रतियोगिता सालघारी-तारपिनस्थित सेवन्थ डे एड्भेन्टिस्ट एकाडेमीमा गत आइतबारको सम्पन्न भएको समाचार प्राप्त भएको छ| उक्त प्रतियोगितामा सिक्किम लगायत उत्तर-बंगालका विभिन्न क्षेत्रहरूबाट १०८ प्रतियोगीले सहभागिता जनाए थिए भने प्रतियोगिताको मुख्य उद्देश्य युवावर्गलाई खेल क्षेत्र प्रोत्साहित गर्दै स्वास्थ्यप्रति जागरूक गराउनु रहेको थियो|

उक्त प्रतियोगितामा मिक्की ङ्गुङलावतीले सब् जुनियर वर्गमा स्वर्ण र सुनैना मुखियाले रजत पदक प्राप्त गरेका छन्| यसरी नै जुनियर वर्गमा प्रियंका गुरूङ, बिनिता छेत्री, प्रशान्त सुब्बा र बिबेक राईले रजत पदक प्राप्त गरेका छन्| यसै क्रममा जुनियर वर्गमा निरूषा गुरूङ, प्रणय प्रधान, आयुष छेत्री, मिलन शर्मा, सोनु  शेरपा, स्नेहा राई, मनिसा प्रधान, प्रवेश छेत्री, सौरव प्रधान र सुनैना मुखियाले कास्य पदक प्राप्त गरेका छन्|